A subdelegada do Goberno en Lugo, Isabel Rodríguez, recoñeceu este luns a preocupación que existe polo incremento no que levamos de ano dos atropelos mortais en vías interurbanas desta provincia.
Durante o acto organizado para conmemorar o Día Mundial en Recordo das Vítimas de Accidentes de Tráfico, a subdelegada precisou que no que levamos de ano producíronse na provincia de Lugo un total de catro atropelos mortais a peóns en diferentes vías interurbanas.
De feito, aínda que o número de vítimas “é inferior ao do ano pasado” no que se refire á sinistralidade viaria na provincia de Lugo, chama “a atención especialmente” ese dato concreto, “pois este ano levamos catro atropelos a peóns en vías interurbanas, unha cifra particularmente elevada”.
“No que vai de ano, levamos na provincia 367 sinistros con vítimas e 18 persoas perderon a vida debido aos accidentes de tráfico”, unha cifra que é “inferior á do pasado ano”, aclarou.
Ademais de lembrar ás vítimas dos accidentes de tráfico e aos seus familiares, a subdelegada tamén aproveitou para pedir a condutores e peóns “prudencia e respecto ás normas de circulación”, ademais de lembrar unha vez máis “o gran perigo que supoñen as distraccións ao volante”.
Son a causa “dunha terceira parte dos accidentes mortais”, lembrou. EFE
