O Partido Popular denunciou en Vilalba o “ataque directo” do Goberno central á estrutura industrial da provincia e asegurou que as “ameazas de peche” que pesan sobre Alcoa e Endesa están motivadas pola “inacción” do Executivo.

Así o asegurou durante un encontro mantido este martes con empresarios celebrado en localidade lucense e no que participaron o conselleiro de Economía, Emprego e Industria, Francisco Conde; a presidenta provincial, Elena Candia; e os candidatos ao Congreso e Senado, José Manuel Barreiro e Joaquín García Díez, ademais doutros cargos orgánicos do PP como José Manuel Balseiro e o portavoz local, Agustín Baamonde.

Na súa intervención, José Manuel Barreiro e Elena Candia lamentaron que, na situación económica e a política actual, palabras como “incerteza estean permanentemente asociadas á industria e ao emprego”. Ademais, lamentaron a “grave situación” que atravesan empresas tan importantes para Lugo e esta comarca, como son Endesa e Alcoa San Cibrao.

Os populares trasladaron aos asistentes que as ameazas de peche están motivadas pola “inacción” do Goberno, algo que aseguran “non entender”, sobre todo, “cando hoxe o propio presidente de Alcoa manifesta nun medio de comunicación que o alumnio é un produto de futuro” ou que é “responsabilidade” do Goberno central axustar o prezo do quilowatt.