Axentes da Policía Nacional da Brigada de Policía Xudicial da Comisaría Provincial Lugo desarticularon un punto de venda de droga na capital tras a detención dunha persoa reincidente e a intervención de cocaína.
As investigacións comezaron o pasado mes de setembro cando, a través dun “labor de captación de información e de recepción de queixas veciñais”, destacou a Policía, tívose coñecemento da existencia dun punto de venda de droga no inmoble situado na rúa Lamas de Prado de Lugo.
As investigacións levaron aos axentes a identificar a un home con antecedentes anteriores por este tipo de feitos, que se dedicaba á venda ao “menudeo” de pequenas doses de cocaína a consumidores habituais que acudían á vivenda e proximidades, o que xeraba “gran malestar” entre os veciños da zona, indicaron as mesmas fontes.
Tras reunirse os indicios necesarios, procedeuse á detención do investigado na rúa Anduriñas cando se dispuña a efectuar unha venda de sustancias estupefaciente, polo que foi arrestado ‘in fraganti’.
A Policía Nacional destacou que hai aproximadamente dous anos esta mesma persoa, que residía na mesma vivenda, fora arrestada por feitos similares.
QUEIXAS
As mesmas fontes policiais incidiron en que a denominada ‘Operación Floder’ se desenvolveu en base á resposta ás queixas e solicitudes veciñais en relación á existencia de puntos de venda de droga en barrios da cidade.
Ademais das doses de cocaína intervidas, aprehendéronse 110 euros en efectivo, froito da transacción de sustancias estupefacientes, concretou as mesmas fontes.
