O presidente da Deputación de Lugo, José Tomei, convocou este venres o pleno extraordinario no que se acordará a disolución da Sociedade Urbanística Provincial (Suplusa) para o vindeiro xoves, día 12, ás 11,00 horas.
O organismo provincial comunicou, a través dunha nota de prensa, que a convocatoria se produciu despois de que tivesen lugar as comisións informativas de asuntos do pleno e de economía, recadación, facenda e especial de contas.
Ademais da extinción da sociedade mercantil, no pleno trataranse dous temas económicos. Por unha banda, a aprobación dun Plan Económico Financeiro (PEF) que a institución debe aplicar por superar, no exercicio de 2018, a regra de teito de gasto (o límite anual de investimentos establecido para as administracións públicas).
Tamén terá lugar a aprobación dun expediente de recoñecemento extraxudicial de crédito para o pago de seis facturas de subministración de materiais para a granxa Gayoso Castro, por un importe de case 75.000 euros.
