O vicesecretario de Participación do Partido Popular e deputado no Congreso Jaime de Olano pediu este venres en Lugo ao goberno de Pedro Sánchez “que ingrese aos concellos da provincia e á Deputación os ingresos que lles retén premeditadamente” e acusou ao presidente da Deputación, José Tomé de porse “de perfil” en relación a esta cuestión.
Jaime de Olano cre que se trata “dunha chantaxe en toda regra”. “O que nos vén dicir o goberno é que ou hai investidura ou non haberá diñeiro nin para pagar a provedores”, explicou, tras o que precisou que son fondos que, na súa maioría, “están destinados a pagar os servizos públicos básicos, sanidade, educación, dependencia, servizos sociais”.
Por todo iso, De Olano anunciou que os deputados na Cámara Alta e no Senado interpelarán ao Goberno para que este “aclare as razóns polas que non se procedeu aínda a transferir ás entidades locais e ás Deputacións os recursos debidos, así como en que forma van cubrir este esforzo orzamentario”.
Os populares esixen a Sánchez “que cumpra coa súa obrigación” e denuncian que “é mentira cando din que un Executivo en funcións non pode aprobar esta medida, porque se fose un goberno responsable, fíxoo antes das eleccións mediante un decreto-lei”.
De Olano tamén cargou contra os responsables socialistas en Galicia, que se puxeron “de perfil”, xa que “o PSdeG e Gonzalo Caballero foron os únicos membros do PSOE dunha Comunidade Autónoma que non reclamaron a transferencia destes fondos”.
Doutra banda, lamentou que o presidente da Deputación, José Tomé, “perdese” unha oportunidade para reclamar o diñeiro que Sánchez retén ás administracións, na reunión que mantiveron en Ourense alcaldes e presidentes provinciais.
SITUACIÓN DE ALCOA
Sobre a situación de Alcoa, De Olano deu a coñecer as preguntas que formularán no Congreso para coñecer as previsións do executivo respecto da ampliación de 90 a 200 millóns as compensacións polos custos indirectos de CO2 á industria electrointensiva e da aprobación do estatuto que tamén prometeu, di, o goberno de Sánchez fai máis de seis meses.
A este respecto, José Manuel Barreiro, anunciou que a interpelación prevista no Senado sobre a situación da multinacional non se pode levar a cabo porque a ministra declinou asistir. Todo iso despois de que a Xunta anunciase que vai solicitar ao goberno reactivar a mesa de traballo e incorporar ao comité da factoría en San Cibrao para buscar unha solución ao prezo eléctrico
