As deficiencias nos servizos sanitarios galegos están a ser unha constante nos últimos meses. A queixa máis recente alude á comarca dos Ancares, onde 450 nenas e nenos quedarán sen atención pediátrica durante esta semana. Así o denuncia o PSOE de Becerreá, que advertiu que “hoxe, martes 13 de agosto, a persoa que atende pediatría no PAC de Becerreá non acudirá ao servizo, polo que non estará dispoñible durante toda a semana”.
A voceira socialista de Becerreá, Ana Rubinos, explica que esta situación afecta a preto de medio millar de crianzas dos concellos de Becerreá, Pedrafita, As Nogais, Cervantes e Navia, todos eles municipios dependentes do servizo de pediatría da localidade becerrega.
Segundo asegura, o PAC de Becerreá ten un servizo de pediatría “escaso”, xa que só atende os martes e xoves pola mañá. Nin sequera hai un médico especialista, di. Lembra que o seu grupo político xa levara a pleno as demandas veciñais que reclamaban un servizo continuado de pediatría no PAC de Becerreá. “Obrigan os pais a deixar de acudir á sanidade pública e contratar seguros en consultas privadas, que seguramente é o que quere o goberno de Feijóo”, lamentan.
UN RURAL “DESATENDIDO”
Neste senso, Rubinos acusa o presidente da Xunta e o seu partido de “non ter sensibilidade cando se trata de atención primaria no medio rural”. “Non teñen en conta para nada a dispersión da poboación nin o evidente risco de ter desatendida toda unha comarca na Montaña lucense”, sentencia a voceira socialista. Piden que todos os nenos e nenas do rural teñan os mesmos dereitos ca os das cidades. Iso, de primeiras, pasaría por designar un médico pediatra para o PAC da localidade. “Queremos unha verdadeira lexislatura do rural, non unha de pacotilla como a que vende o señor Feijóo”, concluíu Rubinos.
