O Ministerio de Fomento licitou a redacción dos proxectos básico e de construción da estación de tren e do aparcadoiro da futura intermodal de Lugo, cuxos traballos prevén iniciarse o próximo ano cun investimento total de entre 27,5 e 31,6 millóns de euros.

Diso informou o Concello de Lugo tras a reunión mantida este luns na capital lucense entre a presdienta da Adif, Isabel Pardo de Vera, a conselleira de Infraestruturas e Mobilidade, Ethel Vázquez, e a alcaldesa de Lugo, Lara Méndez.

Alí, a presidenta da Adif anunciou a licitación dos proxectos, que contan cun orzamento de 1,1 millóns de euros e un prazo de execución de 15 meses.

Pola súa banda, a rexedora luguesa instou a que se produzan avances na firma do convenio entre as tres administracións implicadas na construción da estación intermodal.

E é que a construción da estación de trens correrá a cargo do Ministerio de Fomento, mentres que a Xunta levará a cabo a de autobuses e o Concello de Lugo encargarase da urbanización da zona.

Por iso, Lara Méndez insite na “necesidade” do convenio a tres bandas, pois definirá as responsabilidades de cada administración para que traballen “en paralelo para avanzar ao ritmo máis acelerado posible”.

“Lugo non pode nin debe quedar atrás”, subliñou a alcaldesa, que lembra que Ourense, Santiago e Vigo xa contan cun convenio asinado para o desenvolvemento das súas respectivas estacións intermodais.

Así as cousas, segundo apunta o Concello de Lugo, as tres administracións emprazáronse a celebrar un novo encontro despois do verán.