A alcaldesa de Lugo, Lara Méndez, aprobou o pasado 28 de xullo o decreto relativo ao corte provisional de tráfico para iniciar a construción dunha glorieta no cruce da rúa Mar Cantábrico con Santo Graal e Poeta Manuel María.
Esta obra responde a unha demanda cidadá que xa vén de atrás, posto que esta intersección supón un perigo para os peóns e os condutores. O voceiro socialista Miguel Fernández subliña, así, que a rexedora cumpre co compromiso que fixara cos lucenses para garantir a seguridade vial.
A actuación, que se leva a cabo a través do Plan de barios e que suporá un investimento de 90.120 euros, foi contratada a Construcciones Taboada y Ramos a principios deste ano. A previsión é que as actuacións se desenvolvan nun prazo de catro meses. Porén, o corte da intersección e os desvíos de tráfico non se prolongarán máis dun mes, período durante o cal se executarán os labores de demolición do pavimento e reposición do mesmo.
O corte fai necesario desvíos provisionais para o tráfico rodado, que afectará tamén a dúas liñas de autobús. Así, os automóbiles que procedan de Mar Cantábrico desviaranse a Vázquez Queipo e Rúa das Fontes, e os que accedan desde a zona de Camiño Rosende incorporaranse por Angelo Colocci e Rúa das Fontes.
