O alcalde de Baralla, o popular Manuel González Capón, presentou a súa renuncia despois oito lexislaturas e 32 anos á fronte do consistorio, e un mes despois de gañar as eleccións conseguindo oito concelleiros, fronte a dous do PSOE e un do BNG. Unha enfermidade afástao da primeira liña política e este venres daba por finalizada a súa carreira política nun pleno “emotivo”, aínda que se despachou en apenas dous minutos.
“Foi un pleno rápido e bastante emotivo”, trasladou o número tres da lista do PP e fillo do xa exalcalde, Miguel González, e que soa nas quinielas para ser o futuro rexedor. O concelleiro sinalou que con esta renuncia “acábase cun ciclo”, facendo especial fincapé en que este “ciclo” se pecha por “circunstancias persoais”.
“Remítome aos feitos. Leva 32 anos, con maiorías absolutas. Xa falaron os veciños e as veciñas durante todos estes anos”, sentenciou o tres da lisa popular. O grupo popular sentará a falar a partir do luns e prevese convocar “o pleno (de investidura) a próxima semana”. “Hai que seguir para diante, o máis importante é el e que se centre na súa saúde. O resto é secundario”, preconiza.
A pesar diso, rexeitou pronunciarse sobre a sucesión. “Imos paso a paso, facendo os trámites que hai que pasar. Tampouco temos urxencia e estamos todos no mesmo barco. O concello segue funcionando e non hai ningún problema. A próxima semana sentarémonos e poremos a data do pleno”, remarcou finalmente.
