Os veciños de Meira terán o acceso que merece o principal espazo público do lugar. Esta é a mensaxe que quixeron trasladar esta mañá o alcalde, Antonio de Dios, e mailo presidente da Deputación de Lugo, Darío Campos Conde, coincidindo co comezo das obras na contorna da Praza Maior. Logo da reclamación dos veciños, o rexedor trasladou esta necesidade á instancia provincial, obtendo un acordo para financiar a intervención con 125.000 euros.

O obxectivo das obras é eliminar as barreiras arquitectónicas, renovar o firme circundante e garantir a accesibilidade mediante catro ramplas. Tamén están incluídos outros traballos coma a rehabilitación da pedra e das táboas dos bancos, a instalación de novas luminarias de baixo consumo, e a definición de prazas de aparcadoiro con espazos reservados para usuarios con mobilidade reducida e ambulancia.

Xunto coa supervisión do melloramento deste importante espazo de reunión, que acolle a tradicional feira quincenal e a sobranceira Festa da Malla, o máximo responsable da Deputación acompañou ao alcalde de Meira polos traballos nos núcleos urbanos periféricos. Unha partida provincial de 40.000 euros permitiu afrontar a reforma da Rúa da Balsa, das comunicacións con Riocabo, Vilar de Mouros, Irmia Alta e A Cova. Deste xeito, 150 veciños beneficiáronse dos labores de limpeza, pavimentado, sinalización vertical e instalación de tubaxe, coma é o caso das traídas de auga na Rúa da Balsa.