Un mozo foi detido tras provocar desfeitas nunha empresa, na que traballaba coa identidade doutra persoa, e ameazar ao encargado cunha arma branca.

O detido é un veciño de Guitiriz e supostamente atopábase suplantando a outra persoa, polo que está acusado dun suposto delito de ameazas con arma branca, outro de danos e outro de usurpación de identidade.

Segundo informa a Garda Civil, o home, que pasou a disposición xudicial, chegou a provocar desfeitas nas instalacións da empresa que ascenderían a uns 1.500 euros.

Doutra banda, un menor foi detido acusado de provocar danos en varios vehículos estacionados na vía publica no municipio de Ribadeo. O detido, veciño de Madrid, foi posto a disposición da fiscalía de menores de Lugo, engade a Garda Civil.