A Garda Civil, no marco dun control de estrada no termo municipal de Vilalba, detivo a un veciño da localidade de Rábade de 29 anos como presunto autor dun delito de tráfico de drogas tras esconder un paquete con heroína nunhas matogueiras.
Segundo relatou o Instituto Armado, os feitos tiveron lugar na vía AG-64 (Vilalba-Ferrol), cando o presunto autor detivo o seu vehículo “uns dous quilómetros antes do punto de identificación”. Ante esta “inusual actuación”, os axentes aproximáronse para comprobar o porqué da parada e descubriron unha persoa entre unhas matogueiras pegadas á autovía. Nas inmediacións, observaron “terra movida”.
Alí acharon un paquete de plástico enterrado superficialmente e en cuxo interior se vía unha substancia de cor branca-amarelada. A substancia intervida, cun peso de 80 gramos, “é supostamente heroína”, destacou a Benemérita, que ratificou que a persoa detida foi posta a disposición do Xulgado de Instrución número 1 de Vilalba.
