O presidente da Deputación de Lugo, José Tomé, anunciou este xoves a posta en marcha dun plan “pioneiro” en Galicia para a formación de 321 traballadores provinciais, máis da metade do persoal de funcionarios.

Este plan porase en marcha xa a semana que vén e estenderase ata maio. “Ten un dobre obxectivo: por unha banda, dar ferramentas aos empregados públicos da Deputación para progresar na súa carreira profesional a través da mellora das súas capacidades; e supón tamén unha mellora nas súas condicións laborais e salariais”, explicou Tomé en rolda de prensa.

Son tres os niveis de formación entre os distintos grupos de funcionarios, con catro módulos acerca de: Deputación, recursos humanos, procedementos administrativos e novas tecnoloxías. En total, impartiranse oito edicións do distintos curso, que sumarán 320 horas de formación (40 horas por cada edición).

A participación nestes cursos será “voluntaria“, aínda que “será necesaria para a promoción profesional” na Deputación. “Ao mesmo tempo melloramos o funcionamento na Deputación e a atención nos concellos, a atención aos cidadáns e a prestación de servizos públicos”, valora Tomé. Remarca que estes servizos públicos “son o único escudo eficaz e universal” ante situacións de crises como as que se padece actualmente.