Unha das persoas que traballan na residencia de maiores do Incio e que deu positivo en COVID-19, “ten vínculo” co brote detectado nun edificio en Monforte, onde o número de positivos elevouse a 38, segundo confirmaron fontes de Política Social.
As mesmas fontes precisaron que, aínda que se confirmou esa relación, polo momento séguense analizando os casos e contactos no centro xeriátrico, para aclarar se ese vínculo pode ser a orixe dos 69 contaxios detectados na residencia do Incio, que pertence á Fundación San Rosendo.
Política Social informou este mércores do primeiro positivo nesa residencia, o dese traballador vinculado ao brote de Monforte, pero, 24 horas despois, o número de positivos notificados disparouse ata os 69, dos que 65 son usuarios (máis da metade) e 4 son traballadores.
Segundo confirmaron fontes do departamento autonómico, dous dos usuarios afectados tiveron que ser trasladados a un centro hospitalario, onde permanecen ingresados ‘en planta’.
ASINTOMÁTICOS
Mentres, o resto de casos positivos están illados na residencia, “de momento, asintomáticos”. Pola súa banda, seguindo os protocolos, os traballadores que deron positivo permanecen en corentena nos seus domicilios.
Por outra banda, confirmaron fontes autonómicas, a Xunta descartou de momento intervir esta residencia lucense, como si fixo no seu día con dúas residencias na área de Vigo (DomusVi Barreiro e DomusVi Cangas) e unha na área de Ourense (Nosa Señora de Fátima no Barco de Valdeorras).
