O accidente dun vehículo articulado, que “fixo tesoira” no acceso principal desde a Autovía do Noroeste (A-6) ao polígono industrial do Ceao, en Lugo, mantivo cortada durante máis cinco horas esa vía, que tamén dá acceso á zona norte da cidade, e provocou importantes retencións á primeira hora da mañá.

Segundo informaron a EFE fontes do Subsector de Tráfico da Garda Civil de Lugo, o accidente produciuse ao redor das 04:15 da mañá, pero pasadas as 09:00 horas, o acceso permanecía cortado, porque os servizos de mantemento seguían limpando a estrada, despois da retirada do camión accidentado.

Os mesmos informadores precisaron que non houbo que lamentar danos persoais no sinistro, aínda que si se formaron importantes retencións na entrada ao polígono desde a A-6, dado que a circulación quedou completamente interrompida en sentido ao centro da cidade.

De feito, houbo que desviar por outros accesos tanto ao tráfico procedente do sentido A Coruña como o que chegaba en dirección Madrid.