O presidente do PPdeG, Alberto Núñez Feijóo, e a vicesecretaria de Organización do Partido Popular, Ana Beltrán, arrouparán este domingo a Elena Candia na súa reelección como presidenta provincial.
Así o confirmou a Comisión Organizadora do conclave que preside a vilalbesa Patricia Teijeiro. A formación popular subliña que con esta cita concluirá o proceso iniciado no mes de xullo e que contou cunha campaña “intensa” por parte da única candidata a seguir á fronte do partido na provincia.
Ao longo das últimas semanas, Elena Candia mantivo distintas reunións de traballo para pulsar a opinión da afiliación, recoller as súas propostas e explicar o proxecto político que liderará a partir deste domingo 19. A dirixente lucense deu –e garante que o seguirá facendo– un papel protagonista aos mozos.
O conclave, ao que está previsto que acudan unhas 600 persoas, e que se desenvolverá no pavillón municipal de Outeiro de Rei, dará comezo ás 9,00 horas coa acreditación de compromisarios e dos invitados. Ás 10,30 constituirase e votarase a Mesa do Congreso.
Seguidamente, e tras o saúdo do alcalde de Outeiro de Rei, José Pardo Lombao, como anfitrión do evento, votarase o regulamento e darase lectura á candidatura presentada.
CLAUSURA
Ás 11,15 horas, presentarase o informe de xestión por parte do secretario provincial secretario provincial saínte, Juan Carlos Armesto, e ás 11,30 horas, presentarase e votará o relatorio ‘Un proxecto de partido, un proxecto para Lugo’ por parte da súa coordinadora e deputada autonómica, Cristina Sanz.
Acto seguido, darase lectura os resultados e á proclamación da presidenta. A clausura será ás 12,00 horas e contará coas intervencións de Alberto Núñez Feijóo, Ana Beltrán e de Elena Candia.
