O exportavoz do PP no Senado, José Manuel Barreiro, recoñeceu os “moi malos” resultados do seu partido tras os comicios deste domingo, aínda que reivindicou o peso de Lugo no Estado ao tratarse “das poucas” provincias nas que o PP logrou a vitoria.
“Esa situación en Lugo non é consolo porque o resultado foi moi malo. O que temos que facer é seguir traballando, porque temos unhas eleccións en poucos días de ámbito municipal e europeo en Galicia e nós aspiramos a gañar as dúas, tanto as municipais como as europeas“, asegurou.
Nas eleccións deste 29 de abril os populares quedaron co 33,6%, fronte ao 33,2% dos socialistas, pero moi lonxes dos resultados do 2016, con máis do 47% dos votos.
Con todo, Barreiro puxo en valor os logros alcanzados na provincia “dentro da situación de resultados moi negativos” que experimenta o partido en todo o Estado. “Mantense a representación que tiñamos, de tres senadores e dous deputados nacionais”.
Neste sentido, advertiu de que se produciu o que tentaban “evitar”, é dicir, “a división do centro-dereita”, polo que agora toca “asumir responsabilidades”.
