O Concello de Lugo instalará máis de 1.500 paneis fotovoltaicos para así lograr un aforro enerxético anual dun 52 por cento e unha rebaixa na factura da luz de 300.000 euros.

Así o sinalou en rolda de prensa a propia alcaldesa, Lara Méndez, xunto ao concelleiro de Medio Ambiente, Álvaro Santos. Estes paneis fotovoltaicos montaranse nas dúas piscinas, no edificio administrativo do Seminario, na sede da Policía Local, e tamén nas estacións de tratamento e depuración de augas residuais, entre outros inmobles de titularidade municipal.

Esta iniciativa levarán a cabo tras unha subvención do Instituto para a Diversificación do Aforro Enerxético, que depende do Ministerio de Transición Ecolóxica, por un importe de 2,7 millóns de euros, aos que hai que engadir outros 700.000 que achegará a administración local.

Lara Méndez concretou que se acometerán oito proxectos como parte “dunha aposta decidida polo medio ambiente, por conseguir un Lugo máis verde e máis sustentable”. Ademais do aforro enerxético, a iniciativa permitirá “reducir a factura” e as emisións de CO2 (nun 74,5%) e a previsión é que o investimento este “amortizada” en “pouco máis de dous anos”.