Patrimonio que esmorece: un intento por salvar os frescos dos Vilares
A asociación Lareira de Soños reunirase con políticos locais e provinciais para lembrarlles o compromiso de restaurar as pinturas, en perigo de desaparición.
Os gobernos cambian, pero o patrimonio -e as súas necesidades- permanecen. Iso deben pensar na Asociación Socio-Cultural Lareira de soños dos Vilares. O colectivo pretende reunirse coas novas corporacións da Deputación de Lugo e do Concello de Guitiriz para lembrarlles o compromiso de restaurar as pinturas murais do século XVI.
A comisión de cultura do Parlamento Galego acordara en decembro de 2017 que a Xunta, a Deputación, o Concello e a Diócese de Mondoñedo-Ferrol deberían convir a fórmula definitiva para acometer as melloras nos frescos dos Vilares.
Con iso baixo do brazo, a Lareira solicitará reunirse coa alcaldesa de Guitiriz, Marisol Morandeira, e cos novos responsables da área de Cultura da Deputación Provincial. O seu obxectivo, din, é tratar de recuperar unhas pinturas “tan importantes” e sacalas da “lista vermella do patrimonio do estado” logo de repetidas demandas de solución por parte do colectivo.
Unha vez que o proxecto xa está redactado por encargo de Patrimonio da Xunta de Galicia, a contratación dos traballos depende unicamente de decisións políticas. Polo tanto, dende Lareira de soños insistirán nas súas queixas para frear o “paulatino deterioro” dos frescos e poñerlle remedio antes da súa desaparición definitiva. Así mesmo, pasados os diferentes procesos electorais, solicitarán novamente a Patrimonio retomar os contactos co resto de institucións e trasladarán a situación ata o mesmo Parlamento Europeo.
UNHAS PINTURAS ÚNICAS
Os frescos da igrexa de San Vicenzo dos Vilares constitúen unha serie de catro pinturas de grande valor, das cales unha delas – imposición da casulla de San Ildefonso- é a única con esa temática en toda Galicia.
Desde o seu descubrimento en 1991, os frescos foron deteriorándose ata o punto de estar baixo perigo de desaparición pola falta de actuacións que garantan o seu mantemento ou polas rozaduras dos bancos, as humidades e outras causas ambientais. Tanto é así que foron incluído nas listas vermellas do patrimonio de Galicia e do Estado, tal como explican dende a asociación.
#SALVEMOSOSFRESCOSDOSVILARES
Ante esta situación, a asociación Lareira de Soños botou a andar unha campaña para poñer en valor a importancia destas pinturas. Spots, paneis informaticos, dípticos… son algunhas das iniciativas que levaron a cabo, sen demasiado éxito. Por iso agora centrarán os seus esforzos na busca dun compromiso real por parte dos políticos.
