Confirmado un novo caso de coronavirus na provincia de Lugo. Trátase dun alumno da Facultade de Administración e Dirección de Empresas (ADE) no Campus Terra da USC. A propia universidade alertou o estudantado e o persoal laboral desta situación, logo de que a Delegación de Sanidade lles trasladase a confirmación.
A Facultade detallou, vía correo electrónico, as materias nas que está matriculado a persoa contaxiada, que acudiu a clase ata este mércores 11 de marzo. Así mesmo, tamén se informa da súa participación nun acto celebrado no centro co gallo do Día da Muller.
“Calquera alumno/a, profesor/a e PAS desta Facultade puidemos estar en contacto coa persoa afectada”, advirten. Por iso, piden que se sigan as recomendacións das autoridades sanitarias para evitar unha maior propagación do virus e estar atentos ante posibles síntomas.
