EFE.- O goberno local de Lugo anunciou a súa intención de ceder á Xunta de Galicia a xestión das catro escolas infantís de titularidade municipal que hai na cidade.
O anuncio fixérono despois de que a conselleira de Política Social, Fabiola García, confirmase esta semana que as escolas infantís xestionadas pola administración autonómica serán gratuítas para os segundos fillos e sucesivos de cada familia.
En rolda de prensa, o tenente de alcalde e o concelleiro de Educación, os nacionalistas Rubén Arroxo e Felipe Rivas, anunciaron a intención do goberno local de contactar coa Xunta para que “asuma a xestión das escolas infantís municipais”. Segundo Arroxo, despois das “declaracións do presidente”, Alberto Núñez Feijóo, sobre “as melloras que quere ofertar” nas escolas infantís, “entendemos que a Xunta de Galicia ten que asumir as súas competencias”.
“A Concellería de Educación inviste anualmente máis de 1,3 millóns de euros para ofrecer este servizo a máis de 200 nenos e nenas”, indicou Felipe Rivas, quen lembrou que “aproximadamente o 10 % dese investimento procede das taxas que ingresan as familias”.
“Se a Xunta aplica a gratuidade para o segundo fillo perderíanse parte deses ingresos, sen que se nos ofreza unha explicación de como se vai a compensar esa situación”, insistiu Rivas, quen precisou que a achega actual da administración autonómica para o funcionamento das escolas infantís circunscríbese a 17.000 euros para as catro. Namentres, lembrou, “o Concello está a investir 123.000 euros ao ano na única escola infantil do Consorcio que hai en Lugo”.
“Esperamos que a Xunta de Galicia mostre compromiso e este proceso se estenda o menos posible no tempo”, engadiu o edil nacionalista, ademais de precisar que “no pasado o BNG xa defendeu que a xestión das escolas infantís se trasladase á rede de Galescolas”.
PRAZOS PARA QUE ENTRE EN VIGOR
Nas escolas infantís públicas autonómicas, privadas e concertadas o sistema de gratuidade para o segundo fillo entrará en vigor o próximo día 1 de abril, segundo anunciou o propio presidente da Xunta, Alberto Núñez Feijóo. Mentres tanto, nas de titularidade municipal haberá que agardar ata o próximo curso, a condición de que os concellos non teñan débedas co Consorcio.EFE
