A Garda Civil detivo dous mozos na localidade de Castroverde por agredir a outra persoa nas festas do Cádavo (Baleira), segundo informou o Instituto Armado.

Segundo relataron as mesmas fontes, a detención produciuse ás 19.00 horas do pasado día 20 na vila castroverdesa. Un veciño de Ferrol, de 26 anos, e outro de Lugo, de 24, foron identificados como presuntos autores dun delito de lesións.

Os feitos tiveron lugar durante a madrugada do pasado día 12 de agosto, cando se celebraban as festas do Cádavo. Ao parecer, os detidos agrediron a outro rapaz, que foi trasladado ao Hospital de Lugo en primeira instancia pero, debido ás lesións que presentaba, foi “remitido de maneira urxente” ao Chuac (A Coruña) para practicar unha cirurxía maxilofacial.