O goberno local de Becerreá manterá o Imposto de Bens Inmobles (IBI) no 0,55 por cento, o máis alto da Montaña lucense. Os independentes de Manuel Martínez rexeitaron a proposta do Partido Socialista para equilibrar este gravamen co dos concellos limítrofes, no 0,4, umbral mínimo que marca a lei. O Partido Popular amagou con apoiar a medida para despois dar un voto negativo.
A proposición dos socialistas pasaba non só por rebaixar ata o 0,4 o tipo urbano, tamén indicaba unha bonificación do 95 por cento para os titulares de explotacións agrogandeiras. A voceira Ana Rubinos explicou que unha granxa cun valor catastral de 50.000 euros paga actualmente 275 euros anuais; mentres que coa desgravación solicitada, pasaría a pagar 200, dos que unicamente aboaría 10 euros trala bonificación.
Inicialmente, o grupo popular puxo como condición para o apoio un estudo económico sobre as contías que deixaría de recadar o Consistorio, definindo ademais que só os titulares de explotacións agrícolas poderían beneficiarse da bonificación adicional. Porén, na votación houbo un cambio de parecer e rexeitaron a proposta que o propio Partido Popular enmendara.
Martínez, acusado de “pouco democrático”
De calquera xeito, a bancada que lidera Martínez contaba con asentos abondo (7 de 11) para tumbar a iniciativa, que fora presentada para o pleno municipal de novembro. O alcalde decidiu suspender a convocatoria ordinaria, polo que houbo que agardar á sesión extraordinaria de decembro para debater a rebaixa no IBI.
A voceira socialista criticou que o alcalde non lle permitise realizar unha cuestión durante a fase de rogos e preguntas, incumprindo a normativa. O Partido Socialista ameaza con “tomar medidas” de continuar esta actitude.
Na actualidade, Becerreá é a localidade da contorna co maior tipo en IBI. O 0,55 da cabeceira da comarca dos Ancares contrasta co 0,4 de Pedrafita do Cebreiro, Navia de Suarna, Baleira e Triacastela, ou o 0,5 de Baralla, As Nogais e Cervantes.
Martínez queda sen os soldos millonarios pola marcha atrás do PP
