Un total de 2.671 empresas presentaron solicitudes para realizar un Expediente de Regulación Temporal de Emprego (ERTE) na provincia de Lugo desde que se aprobou o estado de alarma polo coronavirus. Na provincia, estes procedementos afectarían a 9.064 traballadores.
A cifra de solicitudes é máis do dobre ca a rexistrada hai tan só tres días. Daquela, a Consellería de Economía, Emprego e Industria contabilizaba 1.058 empresas pendentes deste trámite, con 3.726 empregados afectados.
No conxunto de Galicia, os datos amosan un incremento do 18% de solicitudes de ERTE e traballadores afectados en tan só 24 horas. Agora, confírmase que 20.987 empresas pediron o ERTE, con efectos sobre 112.284 traballadores.
Ante esta situación, a Xunta habilitou unha liña de teléfono gratuíta para atender as consultas de empresas e traballadores afectados por un ERTE. O número é o 900 815 600 e funciona entre as 8.00 e as 18.00 horas de luns a venres.
