O Bierzo celebrou esta fin de semana a primeira edición dos Premios Morales, adicados á promoción do galego na comarca leonesa. A pedanía das Médulas, no Concello de Carucedo, foi escenario dun certame en honor de Antonio Fernández Morales, auspiciado pola Real Academia Galega, o Instituto de Estudos Bercianos, o Grupo As Médulas, e Edicións Positivas.
O galardón conta asemade co patrocinio da Xunta de Galicia –a través da Dirección Xeral de Política Lingüística– e a Xunta de Castela e León, así como do Consello Comarcal do Bierzo. Representantes de todas estas entidades acompañaron ao alumnado premiado nos I Premios Morales, que na estrea tomou a denominación de ‘Tras os pasos de Morales: Os magostos‘.
Os traballos seleccionados, baseados na obra de Morales, formarán parte dunha publicación presentada durante o acto. Na escolla valorouse a orixinalidade, a creatividade e innovación. Os máis pequenos contribuíron con debuxos acerca de Os magostos, mentres que os estudantes de galego de primaria, secundaria e da Escola Oficial de Idiomas achegaron pezas literarias, nas que se observou especialmente a calidade lingüística.
O poema Os magostos, escrito en galego berciano por Antonio Fernández Morales en 1861, está dispoñible na web do Grupo As Médulas. Trala entrega de premios, comezou un contacontos para cativos e maiores a cargo de Paula Carballeira, na incomparable contorna das Médulas. E na praza principal da pedanía das Médulas, celebrouse o tradicional magosto, no que non faltaron o lume, as castañas e o viño. A ocasión contou coa orquestra Os Pamplinas.
O programa de promoción do galego no Bierzo e en Sanabria, iniciado pola Xunta de Galicia ano 2001, acadou este curso 17/18 os 1101 alumnos e alumnas con dezanove centros adscritos (só un na provincia de Zamora, o resto en León) nestas comarcas estremeiras. A estes hai que engadir un cento de estudantes de galego da Escola Oficial de Idiomas de Ponferrada.
Participaron do evento Manuel González Prieto, membro do Grupo As Médulas para a lingua e cultura galegas do Bierzo; Paco Macías, director de Edicións Positivas, e membro da comisión organizadora dos premios; Anxo Angueira, presidente da Fundación Rosalía de Castro; Héctor Silveiro, membro correspondente da Real Academia Galega polo Bierzo; Ana Carballo, vicetesoureira e membro responsable da sección de lingua e literatura do Instituto de Estudos Bercianos; Iván Alonso, vicepresidente do Consello Comarcal do Bierzo; Alfonso Fernández Pacios, alcalde de Carucedo; Francisco Javier Álvarez Peón, Inspector da Área de Inspección Educativa da Dirección Provincial de Educación de León; Lourdes Batán Aira, subdirectora Xeral de Política Lingüística da Xunta de Galicia.
