Izal, Marea, Xoel López, Beret e Holywater son algúns dos artistas confirmados para a segunda edición do festival Caudal Fest, que terá lugar os días 20 e 21 de setembro en Lugo.
As entradas sairán á venda o martes 21 de maio cunha oferta de lanzamento limitada de 1.000 entradas a 29 euros. O ano pasado, na súa estrea, este festival recibiu a máis de 22.000 asistentes, segundo os datos da organización, que presentou o cartel este mércores.
Como novidade, en 2019 serán dous días completos de festival, o que ampliará a oferta musical para todos os asistentes. Terá como cabezas de cartel aos madrileños Izal e aos navarros Marea, que regresan tras máis de seis anos sen actividade cun novo disco e unha xira que os levará por gran parte de España. Ambos darán actuacións de longa duración.
Un dos estandartes da música galega, Xoel López, e tamén un dos regresos “máis esperados da música lucense”, Holywater, tamén estarán no segundo Caudal Fest. Haberá lugar para a música máis actual coa actuación do exitoso Beret e cun dos grupos revelación de 2018, Carolina Durante. A “festa”, segundo resalta a organización, chegará da man do Adhesivo e A Marabillosa Orquestra do Alcol (A M.Ou.D.A.), mentres que a achega máis urbana virá do rapero ToteKing.
A Bengala, Agoraphobia, Bocanada, Tigre e Diamante e Galician Army serán outras das actuacións que formarán parte da programación do Caudal Fest 2019, de modo que a programación mesturará o indie, o rock, o pop, o rap e a electrónica. As entradas do festival estarán á venda o vindeiro martes 21 de maio ás 11,00 horas. Ademais, a zona de descanso para acampar á beira do festival tamén estará dispoñible ese mesmo día para reservar.
O Caudal Fest reivindícase ao “pór a Lugo no mapa dos festivais nacionais cun dos carteis máis atractivos do norte de España” e tamén como “unha das últimas oportunidades para despedirse do verán, na mellor contorna posible como é o de Lugo e o do río Miño ao seu paso pola cidade”.
