A sentenza absolutoria do Tribunal Supremo despexa o camiño político de Pablo Taboada, alcalde de Palas de Rei. O rexedor do concello da Ulloa fora condenado pola Audiencia Provincial de Lugo a nove anos de inhabilitación e quince meses de cadea por prevaricación e acoso laboral, nun proceso que comezara en 2011 e que o obrigou a deixar as filas do Partido Popular. Neste intre, non descarta volver a presentarse e retornar á formación.
Taboada “non pensa agora” nas municipais. Tampouco en volver ao partido, mais non descarta estas opcións. O fallo do alto tribunal, que eximiu asemade o seu predecesor e outros sete cargos públicos, permítelle “polo menos respirar tranquilo”. Cualificou a sentenza de “demoledora” e asegurou que aclara que “non houbo acoso, senón unha tensa relación” coa denunciante, a entón secretaria municipal.
Recoñece o presidente da corporación de Palas que a causa xudicial xerou un “grandísimo” dano político e persoal. “Fomos practicamente demonizados por moitísima xente, inxustamente. Non lle desexo a ninguén que sexa vítima dunha denuncia falsa”. Por iso, asegura que agardará varias semanas para “meditar” que facer no futuro. Taboada di que “no que menos” pensa é se regresar ao Partido Popular, sobre o que non ten “nada que dicir”.
A acusación contra o alcalde de Palas di que a sentenza xera impunidade
