A Garda Civil detivo a unha muller como presunta autora de roubos a persoas maiores e con mobilidade reducida en Vilalba. Sobre a detida, con antecedentes por delitos contra o patrimonio, pesa a acusación de delito continuado de furto.

A persoa está investigada por roubos cometidos entre os meses de xaneiro e febreiro na cabeceira de comarca. Segundo consta nos informes do operativo, a muller desprazábase a diario dende o domicilio ata Vilalba para pedir esmola, abordando a persoas de avanzada idade e con diversidade funcional das que se aproveitaba para subtraer cartos.

Como suposta autora dos furtos, foi detida este xoves por axentes da Garda Civil. Constan sobre ela numerosos antecedentes por delitos contra o patrimonio, e dende o Instituto Armado trasladan que a pescuda segue aberta, porque non descartan a posibilidade de atopar “máis vítimas” nesta serie de roubos. A muller pasou a disposición do Xulgado de Instrución de Vilalba.