O número de usuarios de residencias de maiores de Galicia infectados por coronavirus descende de novo este xoves e sitúase en 392, 19 menos ca onte. A baixada débese, principalmente, ás altas de usuarios en tres dos centros máis afectados pola pandemia. É o caso do asilo de Vilalba, onde nove residentes recibiron a alta médica.
Desta maneira, o centro de maiores desta localidade deixa de ser o que presenta a maior cifra de usuarios contaxiados. Segundo os datos ofrecidos por Política Social, agora son 106 os residentes con positivo activo, mentres que no xeriátrico Vila do Conde, en Gondomar (Pontevedra), son 110.
En canto aos traballadores, hai 21 persoas empregadas no asilo de Vilalba que continúan constando na listaxe de casos activos.
MÁIS CASOS
A Consellería de Política Social tamén informa de que nas últimas 24 horas foron detectados dous usuarios positivos na residencia San Salvador de Guntín, fronte a tres que foron dados de alta. Así pois, o centro queda con 17 maiores afectados.
