O Concello de Vilalba vén de anunciar a posta en marcha dunha aplicación móbil, ‘En Rede Vilalba’, co obxectivo de ofrecer información sobre as distintas violencias que se exercen sobre as mulleres, nomeadamente as máis novas, e sobre os recursos dispoñibles ao seu alcance.
A app recolle distintos tipos de información que permiten “dotar de ferramentas ás mulleres máis novas por unha canle na que acostuman comunicarse”, subliña a concelleira de Igualdade, Vanesa Siso. “Consideramos moi importante promover un achegamento das rapazas ao Centro de Información á Muller de Vilalba e en xeral aos recursos que teñen ao seu dispor, tratar de proporcionarlles información sobre a forma de actuar ante unha situación de violencia, e principalmente que podan detectar os distintos tipos de violencias machistas que actúan agora tamén nas redes sociais e medios dixitais”.
Así pois, a app, que xa se pode descargar nos smartphones, conta con sete apartados diferenciados: ‘qué é a violencia de xénero’, no que se fai fincapé na violencia dixital; ‘identifico as violencias machistas’, no que se inclúen sinais de alerta e mitos; ‘tips para relacións saudables’; ‘ante a violencia: que podo facer’, para saber como actuar tanto se ocorre en primeira persoa coma se se detecta un caso na contorna próxima; ‘outros teléfonos de interese‘ e ‘para ampliar a miña información’.
