A Casa Habanera será a sede da poesía galega durante tres días. A programación do II Festival de Poesía Guitírica arrincará o venres, 1 de xullo, ás 17:00 horas, co espectáculo infantil ‘Brinca vai de aquí a acola’, de Paco Nogueiras. Ás 18:30 horas Luz Darriba e Xulio Pardo estrearán unha das novidades desta segunda edición, as presentacións vis a vis, con dous autores e dúas obras a un tempo. Seguirá Ainhoa Conde e María Xosé Lamas, xa ás 19:15 horas. A xornada inaugural rematará ás 20:30 horas cun concerto verso de Corredores de Sombra.
O sábado, 2 de xullo, programouse para as 11:15 unha conversa con Clara Blanco, que dará paso ao pregón e presentación do festival coa presencia da pregoeira, a escritora Marica Campo, e Marisol Morandeira. Tralo pregón, ao redor das 13 horas, as rúas de Guitiriz encheranse de versos co Pasarrúas poético. Xa pola tarde, ás 17 horas, Moncho Bouzas e Luz Airado subiranse á tarima da Habanera para a súa presentación vis a vis. Tras eles, farán o propio Curra Figueroa e Eladio Rodríguez, e Lino G. Salgado e Pura Tejelo. Xa ás 19:15 horas, María Álvarez Landesa, xunto con Eva Teixeiro e Alba María, interpretarán Como Dúas Crebas (Medulia). O concerto de peche de xornada será o de Folerpa de Son.
Na clausura, o domingo 3 de xullo, ás 11:30 horas farase a entrega do Premio Díaz Castro de Poesía a Manuel López Rodríguez e as Vilarinhas de Micro Poesía a Teresa Ríos, Fran Fernández Davila e María Álvarez Landesa. Todo isto amenizado pola música de Roger de Flor e Pedro Montilla. O festival rematará cun novo pasarrúas poético.
Ademais, en paralelo ao festival, o venres 1 de xullo inaugurarase a exposición de collages de Clara Martín, que permanecerá na Habanera ata o 29 de xullo, e, por outra banda, expoñeranse as Vilarinhas 2022 durante todo o mes nas farolas de Guitiriz.
