Este mércores finalizou o festival Criterium Aeronáutico, celebrado no aeródromo de Rozas, en Castro de Rei. Este gran evento da aviación, que este 2018 acadou a XIII edición, reuniu a miles de asistentes durante as seis xornadas. Como singularidade deste evento da aviación, o público tivo a oportunidade de participar en diferentes actividades aéreas, desfrutar das exhibicións e aprender in situ sobre a industria que está a instalarse na zona. Pero sobre todo, entrar en contacto coas máquinas e os profesionais da aeronáutica.
As actividades dispostas en Rozas foron tanto de tipo aéreo como non aéreo, e para todos os públicos. Amais das exhibicións, o público non iniciado tivo a oportunidade de facer un voo inaugural, ou estrearse en paracaidismo e voo acrobático. Os máis pequenos tamén puideron probar a pilotaxe de pequenos vehículos aéreos manexados a distancia, os coñecidos como drons.
En terra, xunto coas exposicións de aeronaves, os stands informativos das empresas participantes e os faladoiros, o público tiña á súa disposición varios simuladores, karts a pedais e inchables.
