O Concello de Castro de Rei ten previsto presentar denuncia ante a Garda Civil nas próximas horas por mor das desfeitas provocadas no campo de adestramento do club de fútbol local, que milita na Primeira Rexional, ao “meter un coche no terreo de xogo e realizar numerosos trompos”.
Así o explicou o alcalde da localidade, Francisco Balado, quen atribuíu este suceso a “un vándalo” que “meteu o seu coche no campo e dedicouse a facer trompos ata deixalo boto un noxo”.
Balado precisou que ese terreo de xogo, no que tamén se adestran os rapaces das categorías inferiores do Castro, “non está valado”, pero si “perfectamente delimitado” pola propia “trama urbana de Castro de Ribeiras de Lea”, de modo que a persoa que conducía o coche “tivo que atravesar a beirarrúa para entrar e para saír”.
O rexedor local sospeita que o condutor puido acceder ao campo desde a parte de atrás da Casa da Cultura, que está situado a poucos metros do terreo de xogo, situado á beira do centro médico da localidade e da estrada LU-113.
Á parte das desfeitas causadas, cuxa reparación pode chegar aos 2.000 euros, o alcalde lamentou o feito de que os “rapaces teñan que suspender os adestramentos nese campo” ata que o Concello consiga recuperalo.
“Serán moitas horas de traballo”, recoñeceu.
