O xurado do XXIX Certame Galego de Arte de Begonte, auspiciado polo centro cultural José Domínguez Guizán, fallou o primeiro premio a favor do pintor lucense Manuel Ángel Carreira Varela por Máis aló desta vida. A máxima distinción desta convocatoria anual, enmarcada no 47.º Nadal en Begonte, está dotada de 1.500 euros e unha estatuíña de Sargadelos.
Este tribunal reuniu en Lugo á directora do Museo Provincial de Lugo, Aurelia Balseiro, e mailos pintores Manuel Gulín e Gonzálo Sánchez Folgueira-Zalo, co secretario Xulio Xiz en representación da entidade promotora, sen voz nin voto. Acordaron manifestar “a súa satisfacción” pola cantidade de obras presentadas, ata 25, cun abano de temas e estilos “de excelente nivel”.
Así, non quixeron deixar pasar a ocasión de salientar a obra da máis precoz dos participantes, Emma María Rego Eiroa, moza de quince anos de Viveiro, coa obra Morriña; ou das contribucións dos máis veteranos, Carmen Lolo Pombo e Luis Maceira Crespo, “polo exemplo de dedicación e entusiasmo” pola arte “e as súas sempre excelentes aportacións”.
Canda o primeiro posto para Manuel Ángel Carreira Varela, o xurado concedeu cadansúas mencións de honra, acompañadas dunha estatuíña de Sargadelos, a outros dous artistas: Eduardo Pérez Baamonde, vilalbés residente en Cambados, e Manuel Carballeira Rivas, natural de Sistallo-Cospeito e veciño de Valdoviño.
A entrega de premios do Certame Galego de Arte de Begonte ‘José Domínguez Guizán’ efectuarase o vindeiro 26 de xaneiro, sábado, no decurso dos actos de clausura do 47.º Nadal en Begonte.
A produción artística que arrodea o Nadal trasládase a Vilalba e Lugo
