Un home de 63 anos de idade faleceu este martes nun accidente de tráfico á altura do punto quilómetro 5 da estrada LU-P-0102 (Fontevella a Carrizal) no termo municipal de Pastoriza.

O sinistro produciuse pola saída da vía do vehículo, pola marxe esquerda da mesma, e o posterior choque contra un tractor estacionado. O accidente tivo como resultado o falecemento dun veciño de Abadín, con iniciais LRI, sendo o condutor o único ocupante do turismo, segundo informou a Garda Civil de Lugo.

Segundo os servizos de emerxencias, dous equipos do 112 galego desprazáronse ata o lugar do feito aínda que nada puideron facer para salvar a súa vida. No dispositivo tamén interviñeron os Bombeiros de Vilalba, o GES de Pontenova e a Garda Civil de Tráfico.