Lugo
O Concello de Lugo publicou este venres as listas definitivas de nenos e nenas admitidas no vindeiro curso 2018/2019 para prazas de novo ingreso nas escolas infantís, creadas e mantidas polo Concello de Lugo: Serra de Outes, Gregorio Sanz, Luis Soto Menor e María Wonenburguer; así como as listaxes de espera e desestimados e desestimadas.
Todas as persoas interesadas poden consultar estas listas no Taboleiro de Edictos do Concello, na área de Educación, situada no Centro de Convivencia Uxío Novoneyra, nas propias escolas infantís e no Servizo de Atención Cidadá 010.
O prazo para formalizar a matrícula é do 11 ao 22 de xuño, na escola na que os cativos e cativas teñan praza.
A Pastoriza
O Punto de Atención á Infancia (PAI) da Pastoriza abriu o prazo para a presentación de solicitudes de novo ingreso. Completado o proceso de renovación de matrícula para os nenos e nenas que xa están a ser atendidos, o centro recolle agora as demandas das familias interesadas en acceder por primeira vez ao servizo. Ofrécense para iso trece das vinte prazas coas que conta o PAI.
Os solicitantes deberán presentar a documentación requerida –certificado de empadroamento e documentos relativos á situación económica- nas oficinas de rexistro do concello ata o vindeiro 6 de xullo.
O PAI pastoricense atende este curso a 16 nenos e nenas de distintas localidades do municipio con idades entre tres meses e tres anos, prestando un servizo de apoio asistencial e educativo ás familias.
