O brote rexistrado no municipio de Castro de Rei (Lugo), vinculado a un xornaleiro, mantense con seis casos positivos despois de realizar o Sergas PCR a todo o persoal da empresa para a que traballa o caso inicial. Así o confirmaron fontes da área sanitaria de Lugo, que indicaron este venres que o xoves levaron a cabo 145 PCR e completouse “a totalidade do persoal”.

As mesmas fontes puntualizaron que no marco deste brote rexistrado na área sanitaria de Lugo realizáronse 315 PCR tras sumar as 145 levadas a cabo este xoves. En concreto, 60 o primeiro día aos contactos máis estreitos do primeiro caso –os que traballaban na mesma explotación e vivían con el–, 110 a segunda xornada aos que vivían noutro lado e traballaban na mesma explotación ou próxima.

A elas súmanse as 145 PCR realizadas este xoves ás restantes persoas que traballaban noutras explotacións e vivían noutros lugares distintos dos primeiros. Por tanto, este brote de Castro de Rei segue con seis casos positivos e medio centenar de persoas en corentena, por ser contactos máis estreitos dos positivos.