A Garda Civil detivo a oito persoas como supostos autores dun delito de estafa bancaria na modalidade de phishing, que tiña a Vilalba como epicentro das transaccións económicas. Estas persoas formaban parte dunha rede criminal perfectamente estruturada, na que cada un deles tiña o seu labor claramente definido.

Nun comunicado, a Benemérita destaca que a  investigación se iniciou tras ter coñecemento de varios feitos delituosos de similares características que afectan a tres persoas de Barcelona, Madrid e País Vasco respectivamente. Tras as primeiras pescudas, os axentes logran identificar a varios compoñentes da organización que se encargaban da retirada do diñeiro de orixe fraudulenta das contas das vítimas. “Trátase de oito membros, oriúndos de Colombia, Marrocos, Republica Dominicana, Rumania e España, con idades comprendidas entre os 20 e 36 anos de idade”, apunta. Estes fondos ingresábanse de maneira ilegal nas contas dalgúns compoñentes do tramo máis baixo da organización, o que no argot denomínase “muleros”, para posteriormente entregarllos os do tramo intermedio da trama. Os detidos tiñan as contas en entidades bancarias da localidade lucense de Vilalba, desde as cales facían as transaccións.

As cantidades transferidas ás contas dos membros da organización criminal ascenderían a 100.000 euros, dos que só puideron dispor, ao ser bloqueadas as mesmas por mor da investigación, duns 12.000 euros. As vítimas da estafa recibirían correos electrónicos, suplantando entidades bancarias, nas que mediante engano conseguían os datos dos prexudicados e as súas claves de acceso das contas correntes para posteriormente realizar transferencias non autorizadas de 15.000 euros con destino ás contas de determinados membros da organización.

Tras as primeiras detencións, a Garda Civil foi descubrindo ás persoas que pertencían á trama criminal así como os labores que nela desempeñaban. Deste xeito logrouse desarticular a mesma recuperando así os 12.000 euros dos que chegaron a dispor os membros da rede.

O diñeiro lógrase recuperar oculto nunha zona arborada no paseo do río Magdalena. Este atopábase en diversos sobres marcados, dispostos para facer a repartición dentro dos diferentes compoñentes da organización. A investigación policial continúa aberta non descartando novas detencións en datas próximas.