A Garda Civil, no marco da ‘Operación Tronconus’, detivo dúas persoas de nacionalidade española de 21 e 22 anos, veciños de Lugo e Orbazai, como presuntos integrantes dun grupo criminal dedicado ao roubo con forza en polo menos oito campos de fútbol, vivendas, locais comerciais e garaxes en Galicia.

No rexistro dos domicilios dos detidos recuperáronse numerosos obxectos como armas curtas e longas, maquinaria, ferramentas, motores e outros efectos de diversa índole relacionados cos feitos delituosos investigados.

A operación policial iniciouse o pasado ano, cando a Garda Civil detectou un aumento da comisión de roubos con forza en campos de fútbol, garaxes e vivendas, situados ao longo de toda a xeografía galega. Impútaselles a comisión de polo menos 15 feitos delituosos.

Pola natureza e características dos roubos perpetrados este grupo criminal “estaba altamente cualificado e experimentado, realizando estudos previos dos seus potenciais obxectivos coa finalidade de actuar case sempre en obxectivos desprovistos de medidas de seguridade activa”, relata o Instituto Armado, como alarmas ou sistemas de gravación.

“Unha vez que tiñan asegurado o lugar forzaban o bombín das portas de entrada con ferramentas tipo panca para acceder e subtraer os efectos do seu interior”, indicaron as mesmas fontes.

OPERACIÓN ABERTA

Os efectos subtraídos eran postos a disposición de receptadores para a súa distribución e venda ao longo da xeografía estatal e de terceiros países.

Con esta operación, coordinada polo Xulgado de Instrución número 3 de Lugo, a Garda Civil considera desarticula “unha activa banda delituosa”. A investigación continúa aberta e non descarta máis detencións nas próximas horas.