Tres encapuchados asaltaron o propietario de Gasóleos Ceao cando saía do seu chalé da parroquia do Veral (Lugo) na mañá deste mércores. Ao home abordárono polas costas e atáronlle as mans no garaxe, aínda que finalmente logrou zafarse e pedir axuda a un veciño.
Un dos implicados portaba un coitelo e os outros dous pistolas, coas que pegaron un tiro ao aire, tal e como relatou a vítima aos axentes da Policía, que agora revisarán a zona para tratar de localizar os disparos, segundo fontes da investigación que leva a comisaría de Lugo.
Sobre as 8,00 desta mañá, o empresario saía da súa vivenda na parroquia do Veral cando o asaltaron estes tres individuos. Fontes consultadas apuntan que lle pegaron e, por iso, a vítima presenta “varias brechas na cabeza”, así como unha “fractura de nariz“, polo que foi trasladado ao Hospital Polusa e, posteriormente, ao Hospital Universitario Lucus Augusti (HULA).
Os asaltantes chegaron a atar a vítima para reducila. Con todo, o home logrou liberarse e puido pedir axuda a un veciño na estrada que une os municipios de Lugo e Friol. Este último foi quen avisou á Policía. Varias patrullas trasladáronse ata o lugar e entraron no chalé por se se topaban cos supostos atracadores que, aínda que non chegaron a entrar na casa, si que levaron efectos persoais da vítima, como un reloxo ou as mesmas chaves do negocio que rexenta. A policía rastrexa agora a cidade e os arredores dela para localizar os autores.
