O helicóptero de rescate Pesca I, dos Gardacostas de Galicia, evacuou esta tarde un deportista que resultou ferido na cadeira mentres practicaba rápel no Rego de Carballido, en Folgoso do Courel. O afectado atopábase acompañado por outras persoas, que alertaron o 112 Galicia do accidente poucos minutos antes das 16.00 horas.
Tras recibir o aviso, activouse un operativo no que participaron o 061, o GES de Quiroga, a Garda Civil e Protección Civil de Folgoso do Courel. Os equipos de emerxencias desprazáronse ata a zona para prestar asistencia ao deportista, que presentaba unha lesión que lle impedía desprazarse polos seus propios medios.
Porén, o lugar no que se atopaba o ferido presentaba un acceso “imposible” para os equipos de emerxencias terrestres, segundo informou o 112 Galicia. A lesión na cadeira, ademais, facía inviable a súa evacuación por terra, polo que os servizos de emerxencias optaron finalmente por realizar un rescate aéreo.
Deste xeito, o persoal dos Gardacostas de Galicia, a bordo do Pesca I, conseguiu acceder ata o deportista, recollelo e trasladalo por vía aérea ata Vigo, onde quedou a disposición dos servizos sanitarios.
