A Dirección Xeral de Tráfico (DXT) informou na tarde deste venres da reapertura da autovía A-6 tras o corte de varios quilómetros producido durante día e medio polo envorco dun camión en Baralla na mañá do xoves.
Ás 9,00 horas do 23 de xullo, o envorco dun camión de transporte de vacas sobre un turismo no quilómetro 464 (sentido Madrid), á altura do municipio lucense de Baralla, obrigou a cortar a autovía entre os quilómetros 469 e 461. Tráfico habilitou desvíos alternativos.
A condutora do vehículo conseguiu saír do habitáculo polo seu propio pé. O remolque do camión quedou suspendido lateralmente sobre o desnivel e varios animais precipitáronse e faleceron. Outros dous coches e outro camión tamén se viron implicados no accidente.
Un amplo operativo desprazouse á zona, ademais de habilitarse desvíos entre os quilómetros 469 e 461, sentido Madrid, e en sentido A Coruña, polo tramo de obras na zona. Finalmente, a DXT informou sobre as 19,00 horas deste venres de que se reabre a circulación na zona cortada.
