Unha persoa tivo que ser liberada na mañá deste luns tras envorcar co seu vehículo no municipio do Corgo, concretamente no punto quilométrico 8 da estrada CG-2.2, ao seu paso pola parroquia de Sabarei.
Segundo a información facilitada polo 112 Galicia, o aviso recibiuse minutos antes das 8.00 horas a través da chamada dun particular. Varias testemuñas que se atopaban na zona tentaron socorrer nun primeiro momento ao implicado, que permanecía atrapado no interior do coche.
Ante esta situación, o Centro Integrado de Atención ás Emerxencias alertou aos Bombeiros de Sarria, a Urxencias Sanitarias de Galicia-061, á Garda Civil de Tráfico e aos servizos de mantemento da vía.
Unha vez no punto, os efectivos dos bombeiros procederon á extracción do ferido a través da porta traseira do vehículo. Tras ser liberada, a vítima recibiu asistencia e foi trasladada en ambulancia a un centro hospitalario.
