Un garda civil destinado na Comandancia de Lugo, que se atopaba fóra de servizo, logrou reducir a un individuo que portaba unha arma branca e causaba un altercado nun establecemento hostaleiro da capital lucense. Segundo informou a Garda Civil, os feitos tiveron lugar o pasado martes cando o axente, mentres estaba no interior do local, presenciou como un home duns 50 anos, con síntomas de embriaguez e ferido na cabeza, increpaba a unha camareira.
Despois de que os traballadores conseguisen sacalo do establecemento, o individuo mantivo unha actitude agresiva, proferindo berros e lanzando obxectos contra os presentes. Tras ser advertido para que cesase na súa conduta, o home intentou causar danos na terraza co mobiliario do local. Ante a escalada de tensión, o garda civil identificouse como axente da autoridade e instouno a deponer a súa actitude. Nese intre, o suxeito sacou unha navalla e dirixiuse cara ao axente de forma intimidatoria.
Durante o forcexo para desarmalo, o agresor caeu ao chan e, ao intentar recuperar a navalla agarrándoa polo fío, provocouse un corte nunha man. Finalmente, o axente conseguiu arrebatarlle a arma branca e mantelo reducido na beirarrúa ata a chegada dunha patrulla da Policía Nacional, que se fixo cargo da intervención e da detención do suxeito.
