Un camión envorcou este domingo na A-6 ao seu paso polo municipio lucense de Baralla, en concreto, á altura da parroquia de Arroxo. A pesar do impacto, o seu condutor non resultou ferido. O 112 Galicia recibiu varios avisos de particulares arredor das 13:30 horas, quen alertaron da situación deste vehículo pesado nunha beiravía do punto quilométrico 465 e indicaron que, en principio, o home se atopaba ben.
Ata o lugar desprazáronse efectivos de Urxencias Sanitarias de Galicia-061, aínda que non houbo que trasladar ao condutor ao hospital. Tamén se mobilizaron os Bombeiros por se era necesaria a súa intervención para liberalo, o que tampouco tiveron que facer. O operativo completárono axentes da Garda Civil de Tráfico e persoal de mantemento da estrada.
