A Policía Local de Lugo detivo na tarde do pasado luns, 13 de outubro, a un home de 68 anos como presunto autor dun delito de tentativa de homicidio, despois de agredir cun coitelo ao seu sobriño de 36 anos nunha vivenda do barrio de Santa María de Bóveda.

Os feitos ocorreron ao redor das 20.45 horas, cando a central do 092 recibiu unha chamada de emerxencia alertando de que un home ferira cunha arma branca a un familiar. Varias patrullas desprazáronse de inmediato ao lugar e localizaron á vítima con feridas incisas nunha perna e no brazo esquerdo, e unha hemorraxia abundante.

Segundo o testemuño do propio ferido, a agresión produciuse tras unha disputa doméstica orixinada polo cambio dunha bombona de butano. Durante o altercado, o seu tío asestoulle un corte na cadeira e outro no antebrazo, cando a vítima tentaba defenderse dun ataque dirixido ao pescozo.

Mentres unha patrulla solicitaba asistencia médica urxente, unha axente da Policía Local prestou os primeiros auxilios ao ferido, aplicando manobras que resultaron decisivas para deter a hemorraxia e estabilizar ao home ata a chegada do persoal sanitario. A actuación foi cualificada como exemplar pola súa rapidez e eficacia, reflectindo a profesionalidade e capacidade de resposta do corpo policial.

Paralelamente, outro grupo de axentes accedeu ao interior do domicilio, onde acharon ao presunto agresor sentado fronte a un computador, en aparente estado de calma. O home foi reducido e detido no acto, sendo trasladado posteriormente a dependencias policiais como sospeitoso dun delito de tentativa de homicidio.

Durante o traslado, o detido sufriu un episodio de perda de consciencia, polo que foi atendido polo persoal sanitario desprazado e trasladado de urxencia ao Hospital Universitario Lucus Augusti (HULA), onde quedou ingresado baixo custodia policial.

A vítima, pola súa banda, tamén foi trasladada ao mesmo hospital nunha ambulancia medicalizada, onde recibiu atención inmediata. O agresor permanecerá hospitalizado ata a súa recuperación e será posto a disposición xudicial unha vez reciba a alta médica.