A Garda Civil detivo este martes a un home de 48 anos, de nacionalidade portuguesa, como presunto autor dun incendio forestal por unha “imprudencia” mentres rozaba en Becerreá o pasado 18 de setembro.

Segundo informa a Garda Civil nun comunicado, este home era un traballador sen contrato que realiza traballos de limpeza e roza nas marxes dunha estrada na parroquia de Vilachá. “Levaba traballando sen contrato laboral varios meses, tendo constancia fidedigna o propietario da empresa da devandita vicisitude, xa que era o mesmo que lle pagaba a final de mes en efectivo e sen ningún tipo de xustificante oficial“, explica a Garda Civil.

Os axentes observaron que na zona na que se iniciou o incendio fora rozada ese mesmo día, polo que se identificou nas inmediacións a dous traballadores dunha empresa de rozas, un dos cales era o condutor dun tractor coa rozadora axustada, o cal tentou abandonar o lugar ante a presenza da patrulla.

A investigación determinou que o incendio foi provocado polas faíscas orixinadas nas pedras pola maquinaria rozando as marxes da estrada que se dirixe ao pobo de Bustelo. A Conselleria de Medio Rural da Xunta de Galicia catalogara o índice de risco diario de incendio forestal como alto. As dilixencias policiais foron remitidas á Autoridade Xudicial.

Nun vídeo distribuído pola Garda Civil este martes obsérvase que a este home puxéronlle esposas e foi levado detido por un axente a un cuartel. Acúsaselle de ser presunto autor dun delito de incendio forestal por imprudencia. Este incendio afectou a unhas 13 hectáreas de monte raso e arboledo. Participaron medios terrestres e aéreos para a súa extinción.