A Garda Civil detivo ao catro integrantes dun grupo criminal especializado no roubo de animais en explotacións gandeiras da provincia de Lugo. Os detidos, con idades comprendidas entre os 25 e 53 anos, residían nas localidades de Lancara e Carballedo e xa foron postos a disposición xudicial.
Segundo informou o Instituto Armado, iniciouse unha investigación tras ter constancia dun aumento desta tipoloxía delituosa na provincia lucense e que derivou na detención dos presuntos autores”.
Neste sentido, explicou que os detidos tiñan unha “repartición clara” de funcións na súa organización, desde a persoa que situaba e informaba o lugar, á encargada da loxística, ata os membros que accedían aos recintos gandeiros para cometer as subtraccións.
Deste xeito, “tras subtraer os animais e fracturar o seu crotal identificativo, transportábanos ata o lugar de venda ou a unha leira anexa á vivenda dun dos detidos á espera da súa venda ilícita”.
Aínda que a súa actividade se centraba principalmente na provincia de Lugo, a Garda Civil detallou nun comunicado que de forma puntual tamén o fixeron na provincia de Ourense, “elixindo nalgún caso explotacións gandeiras que coñecían por ser veciños”.
Con todo, a Comandancia debullou que se constatou o ánimo lucrativo ao vender os animais subtraídos a outro integrante do grupo, “onde lles abonaban distintas cantidades económicas dependendo do animal, facendo da actividade do grupo a súa única fonte de ingresos, xa que non se lles coñecía traballo remunerado, salvo a un deles”.
Cabe destacar que se logrou recuperar a maior parte dos animais subtraídos, “os cales foron entregados aos seus lexítimos propietarios”.
