Un condutor que saíu da vía no vehículo no que viaxaba pola estrada LU-546, no termo municipal de Láncara, faleceu este martes, segundo informou a Comandancia da Garda Civil. O sinistro ocorreu sobre as 8,40 horas da mañá, á altura do punto quilómetro 12,200 da estrada que une Nadela e Monforte. O coche saíu da vía pola marxe esquerda e chocou contra un sinal vertical, antes de continuar a marcha por unha rotonda e de deterse a uns 100 metros.

O condutor do turismo, un veciño de Sarria de 88 anos de idade, faleceu, e a súa acompañante resultou ilesa. Investíganse as causas do sinistro e, segundo apuntou a Garda Civil, á espera dos resultados da autopsia, non se descarta que a vítima falecese previamente por causas naturais e, como consecuencia diso, produciuse o accidente.