Os bombeiros tiveron que excarcerar este venres a unha condutora que resultou ferida ao chocar co seu coche contra outro estacionado en Lugo. A implicada foi evacuada en ambulancia ao centro hospitalario de referencia. Foi un particular quen, dez minutos despois das 13.00 horas, deu o aviso ao 112 Galicia dun accidente na Praza Catasol, en Lugo. Segundo informa o servizo de emerxencias, relatou que un coche acababa de chocar contra outro que se atopaba estacionado.
A única persoa implicada estaba ferida e non conseguía saír do seu vehículo. Os bombeiros municipais traballaron para liberala, tras o que foi evacuada ao centro hospitalario de referencia. No operativo participaron Urxencias Sanitarias de Galicia-061, os bombeiros e a Policía Local de Lugo.
